2016

دلاور علی آذر کا تازہ سلام:
آ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خیموں کی آگ بڑھتی ہُوئی جستجو میں ہے
اِک دشت کی تلاش مری ہاوہو میں ہے

ہُونے کو آج بھی ہے بپا کربلائے عصر
لیکن جو بات خون کے پہلے وضو میں ہے

جس کو غمِ حسین میں کھینچا تھا آنکھ سے
اُس اشک کا نمَک مِرے سارے لہو میں ہے

شکلِ امام شکلِ پیمبر ہے اصل میں
آئینے کا جمال ہی آئینہ رو میں ہے

رنگِ سپید و سُرخ میں اِک آنچ ہے الَگ
وہ بات آنسوؤں میں نہیں جو لہو میں ہے

ہَر گھونٹ اُن کی یاد دلاتا ہے آج بھی
آزَر بَلا کی پیاس ہمارے سبو میں ہے

دلاورعلی آزر

محترمہ نسرین سید صاحبہ کا تازہ سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غمِ حسین سے الفت ، یہ ہے عزا داری
نہیں ہے رسم ، مودّت, یہ ہے عزا داری

جو آنسوؤں کی لڑی ٹوٹ ٹوٹ جاتی ہے
تو کس لیے ہے یہ حیرت ، یہ ہے عزا داری

نہ پوچھ دشتِ بلا کیوں اساس ہے غم کی؟
نہیں ہے کوئی وضاحت ، یہ ہے عزا داری

کسی نے آنکھ کو پھر کارِ اشکِ خوں سونپا
نہیں جنوں ، نہیں وحشت ، یہ ہے عزا داری

تجھے بھی رنج ہے جو اہلِ بیت پر گزری
ترے بھی دل میں ہے رقّت ، یہ ہے عزا داری

لگا رہی ہوں سبیلیں میں تشنہ کام کے نام
وہاں تھی پیاس کی شدت، یہ ہے عزا داری
Nasreen Syed


سید وصی الحسن نقاش کی نقش گری:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جاؤں گا جب میں روضہ سرور کے سامنے
قطرہ لگے گا کیسا سمندر کے سامنے
مرحب کی ماں بھی جانتی تھی اس اصول کو
مرتا ہے وہ جو آتا ہے حیدر کے سامنے
خیمے سے بی بی دیکھ لے چہرہ حسین کا
کوئ لگا دے آئنہ منظر کے سامنے
کرب و بلا میں شاہ نے بدلا ہے یوں حساب
اب جو عدد ہے کم ہے بہتر کے سامنے
لگتا ہے مجھکو آج بھی مدح حسین میں
قرآن پڑھ رہا ہوں پیمبر کے سامنے
مرتا ہوں اسلئے کہ پیؤں جا کے بعد مرگ
کوثر کا جام ساقئ کوثر کے سامنے
مجلس میں آج سارے عزادار آئیں گے
پلکیں بچھا کے آیا ہوں میں گھر کے سامنے
نقاشؔ سوچتا ہوں تبرک بٹّے گا کیا
مجلس اگر بپا ہوئ کوثر کے سامنے
Wasi Hasan


اسلام آباد سے رحمان حفیظ صاحب کا ھدیہٗ سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فرشتے کہتے تھے، دے اذن ایک بار حسین
بس ایک بار مدد کے لئے پکار حسین

ہو جس قدر بھی قوی، ہے شکست باطل کو
یزید کے لئے کب چاہیئیں ہزار حسین

فنا بقا کا تصوّر سکھایا کربل نے
کہ بر طرف ہیں یزیدی تو بر قرار حسین

یزیدیَت تو سمٹ کر وہیں پہ ختم ہوئی
جہاں میں پھیلتا جاتا ہے شاخسار حسین

چٹان ٹوٹ تو جائے گی، پر نہ سرِکے گی
یہی بتاتاتھا دشمن کو بار بار حسین

کسی طرح نہیں کٹتی یہ شامِ عاشورہ
خیال و خواب میں آتا ہے بار بار حسین

تمہاری تشنہ لبی کا خراج ہیں مرے اشک
سلام کہتی ہے یہ چشمِ آبدار حسین
Rehman Hafeez

خمار میرزادہ کا تازہ سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام بحضور مولا حسین علیہ السلام

آنے دو ایک بار نشانی حسین کی
کردار ڈھونڈ لے گی کہانی حسین کی

آتی ہے ننگے پاؤں کھلے سر جلوس میں
تاریخ آج بھی ہے دوانی حسین کی

پھر بھی خود اپنی دھول میں بے نام تاج و تخت
پھر بھی شہی زمینی زمانی حسین کی

کہنا تھا جس کا موت کو" احلی من العسل"
قاسم میں تھی فصیح بیانی حسین کی

چودہ سو سال بعد بھی جوش و خروش سے
آنکھوں میں تازہ دم ہے روانی حسین کی

اس درد کی حدود سے خارج ہے کہنگی
ہوتی نہیں ہے یاد پرانی حسین کی

میں نے خمار اجر_ رسالت کے باب میں
لکھی ہے لوح_ دل پہ کہانی حسین کی

Khumar Meerzada


احمد عرفان صاحب کا سلام بحضورِ امامِ عالی مقام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شبیر (ع )میرے سینے میں دلگیر تیرا غم
اِس کائنات میں مری جاگیر تیرا غم

ہر ایک رنج و غم کا مداوا غمِ حسین (ع )
ہر اک ستم رسید کو اکسیر تیرا غم

میرے حسین( ع ) تیری تلاوت سرِ سناں
ذبحِ عظیم کی ہے وہ تفسیر تیرا غم

ممکن کہاں ہے شامِ غریباں کو سوچنا
ممکن کہاں کہ ہو سکے تحریر تیرا غم

دل میں ہے جاگزیں تری بس یاد کے نقوش
آنکھوں میں ہے وہ خواب کہ تعبیر تیرا غم
Ahmed Irfan
شاعرِ طرحدار احمد شہریار کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نجف سے ہوکے چلا سوئے کربلائے حسین
ابوتراب کا تحفہ ہے خاکِ پائے حسین
۔
ہر ایک سمت اندھیرا تھا خیمۂ جاں میں
دیا بجھا کے مجھے روشنی میں لائے حسین
۔
صدائے ماتمِ زنجیر تھم نہیں سکتی
خدا دلوں کو دھڑکتا رکھے برائے حسین
۔
"حسینُ منی۔۔۔" سو مدحِ رسول کرتا ہوں
مرے رسول سے ہوتی ہے ابتدائے حسین
۔
میاں! یہ تیرے مرے بس کی بات تھوڑی ہے
خدا بنے تو کسی کی سمجھ میں آئے حسین
۔
مری مجال کہ میں تیری بندگی نہ کروں؟
تجھے حسین نے پوجا ہے اے خدائے حسین!
۔
میں بوئے گل سے پہنچتا ہوں باغِ جنت تک
غمِ حسین میں رہتا ہوں مبتلائے حسین
۔
میاں یہ سانس نہیں، اس یاد چلتی ہے
میں مرنہ جاؤں اگر مجھ کو بھول جائے حسین
Ahmed Shehryar
— with Kiran Naqvi.



منقبت شریف ببارگاہِ سید الشہدا حضرت سیدنا امامِ حسین علیہ السلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سید محمد نورالحسن نور ( انڈیا)

چراغِ خانئہ زہرا حسین ابنِ علی
وقارِ عظمتِ کعبہ حسین ابنِ علی

طنابِ خیمئہ اسلام, جانِ دینِ مبیں
ستونِ قصرِ شریعہ حسین ابنِ علی

مٹا سکے گی نہ باطل کی ضربِ کاری بھی
ترا طریقئہ سادہ حسین ابنِ علی

بتا رہا ہے عبادت کا فلسفہ ہم کو
تمہارا آخری سجدہ حسین ابنِ علی

زبانِ حال سے یہ کہہ رہا ہے خوابِ خلیل
تمہیں ہو میرا خلاصہ حسین ابنِ علی

قریب تھا کہ نکل جاتا دم صداقت کا
تو بن کے آیا مسیحا حسین ابنِ علی

مہک گیا ہے زمانہ وفا کی خوشبو سے
کھلا جو تیرا دریچہ حسین ابنِ علی

اندھیرے چاروں طرف سے مجھے ہیں گھیرے ہوئے
مدد کو آؤ خدارا حسین ابنِ علی

جدھر نگاہ اٹھاتا ہوں, دیکھتا ہوں جدھر
ہے ایک یاس کا دریا حسین ابنِ علی

غموں کے ابر ہیں چھائے ہوئے فضاؤں میں
کرم کا بھج دو جھونکا حسین ابنِ علی

فلک کے چاند کو دیکھا تو یہ گمان ہوا
ہے تیرا نقشِ کفِ پا حسین ابنِ علی

کہاں وہ لائے گا خاطر میں اہلِ ثروت کو
جو ہو گیا ترا منگتا حسین ابنِ علی

یقیں ہے نورؔ کو, محشر میں کام آئے گا
تمہاری یاد میں رونا حسین ابنِ علی

سید محمد نورالحسن نورؔ


Sajjad Bloch
سجاد بلوچ صاحب کا نذرانہٗ عقیدت:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اسی سبب تو حرارت ہے کوئی جینے میں
وہ ایک دشت بسایا ہوا ہے سینے میں

افق پہ چاند محرم کا پھر طلوع ہوا
اور اِک لکیر پڑی دل کے آبگینے میں

نبیؐ کا چین مدینے سے کربلاگیا ہے
سو کربلا مجھے بھولی نہیں مدینے میں

غمِ حسین بہت ہی لطیف غم ہے دوست
یہ صرف اترتا ہے احساس کے قرینے میں
— with Kiran Naqvi.



Arshad Shaheen
جناب ارشد شاہین صاحب کا
سلام بحضور شہیدِ کربلا حضرت امام حسینؑ:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خدا کے دین کے ضامن ، مرے امام حسینؑ
سلام تجھ پہ دل و جان سے سلام ، حسینؑ

درودِ پاک وظیفہ ہو زندگی کا مری
سلام پڑھتا رہوں تجھ پہ صبح و شام، حسینؑ

جہاں میں ایک علامت ہے استقامت کی
برائے دینِ محمد ﷺ ترا قیام ، حسینؑ

یہ تیرے صبر کا اعجاز ہے لبِ دریا
رہا ہے تیرا مخالف ہی تشنہ کام ، حسینؑ

مقامِ رشک و تفاخر ہے آدمی کے لیے
ملا ہے تجھ کو زمانے میں جو مقام ، حسینؑ

جلے گا تیری محبت کا دیپ تا بہ ابد
رہے گا زندہ زمانے میں تیرا نام حسینؑ

عَلَم بلند رہے گا تری شجاعت کا
جہاں کو دیتا رہے گا ترا پیام حسینؑ

کسی یزید کی بیعت قبول کیسے کرے
پیا ہو تیری محبت کا جس نے جام ، حسینؑ

تو پھر یہ عشق کے دعوے فضول ہیں سارے
نہیں عمل میں اگر تیرا احترام حسینؑ

یہ فخر کافی ہے ارشد کو زندگانی میں
کہ لوگ کہتے ہیں مجھ کو ترا غلام ، حسینؑ


Irum Naqvi
سلا م بر امامِ عالی مقام
ـــــــــــــــــــــــــــــــــــــــــ
ارم نقوی صاحبہ کا سلام:

نہ تخت و تاج نہ ہی عیشِ خسروی کے لیئے
حسین (ع) کربلا آئے تھے آگہی کے لیئے

وہ آگہی کہ جو حر (ع) کے نصیب میں آئ
بہت ضروری تھی قسمت یاوری کے لیئے

امام (ع) وہ ہے جو تحت الثری بھی کام آئے
مثالِ خضر(ع) ہو دنیا میں رہبری کے لیئے

علی (ع) شناس ہی غربت کو سہہ گۓ اکثر
شعور چاہیۓ افکارِ بوذری (ع) کے لیۓ

زبانِ حق ہو تو میثم (ع) بھی دار پر بولے
مزاج چاہیۓ کردار قنبری (ع) کے لیۓ

انی پہ سر ہو یا فاران سے صدائے رسول ( ص)
خطاب ہوتا ہے احکامِ داوری کے لینے

خلیلِ کربلا (ع) ، برچھی کا پھل ، پسر بے جان
کلیجہ چاہیئے ہاں ایسی بندگی کے لیۓ

ستم تو یہ کہ رہا بے کفن وہ لختِ رسول ( ص )
ہیں خود ملائکہ جس کی مجاوری کے لیئے

مثالِ سورہِ کوثر وہ اصغرِ(ع) بے شیر
منادی کرگیا دشمن کی ابتری کے لیئے

سکینہ (ع) سو گئ زندان کے اندھیروں میں
کفن نہ مل سکا بابا کی لاڈلی کے لیئے

ملا ہے تربتِ عباس (ع) کو شرف ایسا
طواف کرتا ہے خود آب اس جری کے لیئے

خطیبِ نہجِ بلاغہ (ع) کی وارثہ کو ارم
علی (ع) کا لہجہ ملا حق کی برتری کے لیئے
۔۔۔۔۔۔۔۔۔۔۔۔۔۔۔۔۔۔۔۔
Ahmed Jahangir
احمد جہانگیر صاحب کا نذرانہٗ عقیدت:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرشد چراغ خیمہء رحمت بجھائے گا
یکلخت نور دور تلک پھیل جاۓ گا

لکھنے تو بیٹھ پیاس کے ماروں کا تذکرہ
آب سخن کا جام مدینے سے آئے گا

یہ اپنے اختیار کی شے ہے جناب من
اشک عزا کو جبر کہاں روک پائے گا

رہئیو سنبھل کے گیتی و مریخ و آفتاب
اک باپ،اک جوان کے لاشے پہ آئے گا

کب مرثیہ پڑھے گا یہ بیمار، ہائے ہائے
والشام کی صدا سے دلوں کو ہلائے گا

بس اب تبرکات نکلنے کی دیر ہے
پرچم کسی کا جھوم کے سر کو اٹھائے گا
۔۔۔۔۔۔۔۔۔۔۔۔۔۔۔۔۔۔۔۔

Nadeem Qais
ندیم قیس صاحب کا خوبصورت سلام:
(بشکریہ دلآاور علی آذر)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آنکھوں میں خون آئے تو سمجھو عطائے غم ہے یہ
نسبت ہے اس کو آپ سے عقدہ کُشائے غم ہے یہ

پھیلے گی آگ دشت میں خیموں سے ہو کے ہر طرف
چلتی رہے گی عمر بھر یوں بھی ہَوائے غم ہے یہ

سورج ڈھلے ہیں ریت پر خیمے جلے ہیں ریت پر
خنجر چلے ہیں ریت پر بچوں پہ ہائے غم ہے یہ

غم ہے مرے حسین کا نانا کے نورعین کا
کیوں کر نہ روحِ عصر میں آکر سمائے غم ہے یہ

پینے کو پیاس ہی ملی آل نبی کو دشت میں
اصغر سے شیرخوار کو آنسو پلائے غم ہے یہ

بادل اُڑا کے لے گئی بادِ سموم کس طرف
جن پر ہمیں یقین تھا وہ بھی نہ آئے غم ہے یہ

وسعت غمِ حسین کی بڑھ کر ہے کائنات سے
روشن ہے یوں چراغِ اشک غم ہے بنائے غم ہے یہ

ماتم کناں ہیں دھڑکنیں لحظہ بہ لحظہ دم بہ دم
دل ہے ندیم قیس کا حسرت سرائے غم ہے یہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Manzar Naqvi
محترم المقام سید منظر نقوی صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دریائے دین_حق کی روانی حسین ہے
پیاسی ہے نہر_علقمہ پانی حسین ہے

جس پر کسی زوال کا سایہ نہ پڑ سکا
اسلام تیری نور فشانی حسین ہے

مردہ دلوں کو چاہئیے دنیا کی آب و تاب
زندہ دلوں کی درد کہانی حسین ہے

یکجا ہوئے ہیں جس میں سب اوصاف_انبیا
زبح _عظیم ایک نشانی حسین ہے
سیرت میں مصطفے ہے شجاعت میں مرتضے
قرآں کا حرف حرف معانی حسین ہے

قصر_یزید آگ ہے ناپاک،حشر تک
خاک_شفا جو پاک ہے پانی حسین ہے

سجدہ ہے زیر_تیغ ، تلاوت سر_سناں
منظر نماز_عشق کا بانی حسین ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈاکٹرسید اسد علی شاہ(سرگودھا) کا تازہ سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خون سے تر یہ جس کا چہرا ہے
سبط_ احمد ص ، علی ع کا بیٹا ہے

نورِ ایمان فیض ہے اسکا
اک دیا ظاہراً جو بجهتا ہے

تا بہ افلاک شور ہے برپا
خیمہ کس بے نوا کا جلتا ہے

ہر نیا زخم کها کے مولا ع نے
سبز گنبد کی اءور دیکھا ہے

بعد غازی ع کے ثانیء زہرا ع
کیا غضب ہے کہ آج تنہا ہے

انکے روزے پہ جا کے دیکھ اسد
خود کہے گا حسین ع سب کا ہے
Asad Shah
۔۔۔۔۔۔۔۔۔۔۔۔۔۔۔۔

سلام ............. فیصل عجمی:
(بشکریہ ذاکر حسین ضیائی)

وہ شام ڈھلتی رہی خون کی روانی میں
فرات ڈوبتا جاتا تھا اپنے پانی میں

جو تیرے بعد ترے کارواں پہ اتری تھی
ٹھہر گئی ہے وہی رات زندگانی میں

زمیں پہ اس کی حنا بندیوں کا موسم تھا
جسے بلایا گیا اس کی نوجوانی میں

جو آنکھ تیری محبت میں نم نہیں ہوتی
وہ ڈوب جائے گی خود اپنی رائیگانی میں

نہ پوچھ کس لیے آنکھوں سے خون جاری ہے
مجھے یہ دکھ ہے کہ میں کیوں نہیں کہانی میں
۔۔۔۔۔۔۔۔۔۔۔۔۔۔۔۔۔۔۔۔۔۔
سلام۔۔۔۔۔۔۔۔۔کاشف حسین غائر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بس عرش دیکھتا تھا مقدر حسینؑ کا
نیزے پہ جب بلند ہُوا سر حسینؑ کا

اندر سے ہل کے رہ گئی فوجِ یزید بھی
لشکر پہ بھاری پڑ گیا اصغؑر، حسینؑ کا

ایسی شکستِ فاش ہوئی ہے یزید کو
اب حشر تک رہے گا اسے ڈر حسینؑ کا

اے بے خبر! خبر ہے، سبھی کے حسینؑ ہیں
تُو کوئی بھی ہو خیر، ادب کر حسینؑ کا

صاحب، ہمارے گریے کو گریہ نہ جانیے
یہ ذکر ہو رہا ہے برابر حسینؑ کا

غائر پڑے رہو کہ درِ اہلِ بیت ہے
جنت کی سمت کھلتا ہے یہ در حسینؑ کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام بحضور سیدِ کربلا امام عالی مقام ابی عبداللہ الحسین سلام اللہ علیہ:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام گزار: عباس عدیم قریشی


سلام گزار: عباس عدیم قریشی

جز ذکرِ شہنشاہِ شہیداں نہیں کہتا
اس ماہ، تغزل میں ، بہ ایماں نہیں کہتا

بن پڑتا ھے جو کچھ وہ ھے نذرانۂ مولا
اک شعر غزل کا سرِ امکاں نہیں کہتا

واللہ ، دریں باب مرا ذوق الگ ھے
میں آلِ محمد کو یوں ارزاں نہیں کہتا

لکھتا ھوں سلام ابنِ علی سبطِ نبی پر
اک حرفِ غلو بابتِ شاھاں نہیں کہتا

جس گھر کے تسلط میں ھیں سب ارض وسماوات
اس گھر کو تہی زر، تہی داماں نہیں کہتا

بے بہرہ ھے اس شام کی تابش سے وھی جو
اس شام کو سرنامۂ عرفاں نہیں کہتا

اس شامِ گواھی پہ فدا، مہر جہانتاب
بدبخت ھی اس شام کو تاباں نہیں کہتا

وہ ارضِ کرم زا کہ چنیدۂ شہادت
میں دشتِ مقدس کو بیاباں نہیں کہتا

جس ریت پہ لکھی گئی الفت کی گواھی
کون؟ اس کو شبِ درد کا درماں نہیں کہتا

وہ جن کو تلاوت کا سلیقہ ھے سناں پر
تو اب بھی انہیں وارثِ قرآں نہیں کہتا؟

ٹھوکر پہ عدیم ایسا میں رکھتا ھوں عقیدہ
اس گھر سے تعلق کو جو ایماں نہیں کہتا

خاکپاے غلامانِ آل عبا
عباس عدیم قریشی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جناب اختر حسین جعفری صاحب کا ایک نادر سلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ امیر حسین جعفری:

مجلسِ شہ میں نئی سطرِ معانی پڑھیئے
سخن اس پر ہو تو کیوں نظم پرانی پڑھیئے

وہی اک درسِ فنا اول و آخر موجود
چاہے سو بار تجھے عالمِ فانی پڑھیئے

کس کا اقرار سرِ نوک سناں شہ نے کیا
بات کیا تھی جو تہِ تیغ نہ مانی پڑھیئے

چہرہ احمد مرسل کو بہ تفصیل پڑھیں
اسی تفصیل میں اکبر کی جوانی پڑھیئے

صفحہِ دشت پہ یا ریت تھی یا پیاس تھی درج
کہیں پانی تھا تو کیسے اسے پانی پڑھیئے

جمع میں کرتا ہوں جلتے ہوئے خیموں کے حروف
آپ اس شام بیاباں کی کہانی پڑھیئے

کہاں ترتیب میں اس طرح کے غم آتے ہیں
اشک عنواں کو یہاں مصرعِ ثانی پڑھیئے
اختر حسین جعفری
Ameer Hussain Jafri

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام : مرزا حسن مجتبیٰ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عرش پر پهیل گۓ بن کے ستارے آنسو
مجلس- شاه ع میں بکھرے جو همارے آنسو

انبیاء ع پر هوا جسطرح صحیفوں کا نزول
ایسے خالق نے ان آنکھوں په اتارے آنسو

غم - دنیا میں بهانا مجھے منظور نهیں
غم- سرور ع کے لیۓ وقف هیں سارے آنسو

اسطرح چنتے هیں آ آ کے ملک مجلس میں
جیسے هوں عرش کے ٹوٹے هوۓ تارے آنسو

منکر- مجلس- شبیر ع ترا کیا هوگا ؟؟؟
میری کشتی تو لگا دیں گے کنارے آنسو

گو که بیرنگ هیں, پھر بھی یه یقیں هے هم کو
رنگ دکھلائیں گے اک روز همارے آنسو !!!

کتنے میٹھے هیں ثمر ان کے تمهیں کیا معلوم ؟؟
غم- سرور ع میں نکلتے هیں جو کھارے آنسو

پهلے سونا تھے مگر بن گۓ مثل - کندن
آتش- عشق سے جب هم نے گزارے آنسو

اپنے رومال میں رکھتی هیں سجا کر ان کو
کتنے محبوب هیں زهرا ع کو همارے آنسو

جب میں گھبرایا حسن قبر کی تاریکی سے
جگنوؤں کی طرح روشن هوۓ سارے آنسو
Mirza Hasan Mujtaba

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ندیم بھابہ کا قلندرانہ ھدیہٗ تبریک:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سائیں حُسین پاک کی بارگاہ میں

سردار بھلے سردار جی تم عشق صحیفہ ہو
تم راضی مرضی یار کے ہمیں اپنا جھوٹا دو

تم فخر ہو آقا پاک ﷺ کا تم فقر کی ہو پہچان
تم بی بی پاک کا نور ہو سلطانوں کے سلطان

تم شیرِ خدا کے لاڈلے تم اللہ کی تلوار
تم سائیں حسن کا پیار ہو اور نانا ﷺ کی دستار

تم پاک ازل سے پاک ہو اور کن سے پہلے نور
تم تھے جب کوئی تھا نہیں دو آنکھوں میں مستور

تفسیر ہو کلمہ پاک کی جو دور کرے ظلمات
تم چلتے پھرتے نور ہو تم مولا کی ہو ذات

تم ہمت ہو عشاق کی اور الااللہ کا راز
تم اسماعیل کا پریم ہو اور ابراہیم انداز

تم ساجد کے ہو دوش پر اور سجدہ ہوا طویل
تم عین وضاحت عشق کی اور حق کی صاف دلیل

تم گردن پر قربان ہم جہاں بوسے دیں سرکار
تم رحمت کی آغوش میں تم جنت کے سردار

تم مالک ہو مخدوم ہو ہم کیسے کہیں مظلوم
تم خلقت میں حق بانٹتے ہم کیسے کہیں محروم

سردار بھلے سردار جی تم پر ہو درود سلام
تم خاص طریقت فقر کی تم اصل میں ہو اسلام

تم ابرو جو تلوار ہیں ہم اس تلوار کی دھار
تم آنکھیں جو دستور ہیں ہم ان کے تابعدار

یہ دس دن کا کب عشق ہے یہ عشق ہے پورا سال
یہ گیان میں پورا ہجر ہے اور دھیان میں عین وصال

سردار بھلے سردار جی تم لج ہو اور لج پال
ہم منگتے ہیں سردار جی ہمیں بھر بھر دیجو تھال

بو جہل یزید سے پاک ہے یہ ہند تمہارا ہے
سردار بھلے سردار جی سب تم پر وارا ہے

آدم کی دھرتی چاہتی تم آپ ظہور کرو
چاہے تو ظاہر ہو رہو چاہے مستور رہو
Muhammad Nadeem Bhabha

۔۔۔۔۔۔۔۔۔۔۔۔۔۔۔۔۔
ڈاکٹر ثروت زہرا۔ شارجہ کی ایک نظم:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آدمیت کے شہسوارو:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شعور کرب وبلا کے
آدمیت کے شہ سوارو
تمھاری آہٹٓ
شعور ہستی کی آ رزو ہے
تمھاری آہوں کی یہ صدا تو
فصیل شب میں
نئے اجالوں کی جستجو ہے

شعور کرب وبلا کے
آدمیت کے
شہ سوارو
تمہارے ہونٹوں کی تشنگی میں
ہیں سیرگی کے ہزار موسم
تمہارے زخموں میں
زندگی کے
ہزار مرہم

شعور کرب وبلا کے آدمیت کے
شہ سوارو
تمھارے چہروں کی
اس اداسی
آس ایک چپ میں
ہزاروں صدیوں کی گفتگو ہے
Sarwat Zahra
۔۔۔۔۔۔۔۔۔۔۔۔۔۔۔۔۔۔۔۔۔۔

Liaqat Jafri
______ لیاقت جعفری صاحب کا سلام ۔۔۔۔۔۔
=========================

صبر سے آراستہ تھا راستہ شبیر کا
جا رہا تھا کربلا جب قافلہ شبیر کا

تھک گیا میرا قلم اور مجھ کو نیند آنے لگی
میں مرتّب کر رہا تھا مرتبہ شبیر کا

کیسے ممکن ہے کہ مجھ کو چھو سکے کوئی یزید
کِھینچ کے رکھا ہے میں نے، دائرہ شبیر کا

قدرتِ الله دیکھو ہے شہیدوں میں شُمار
ایک دن روکا تھا جس نے راستہ شبیر کا

آج تک تاریخ ثابت کر نا پائی.....کربلا
معجزہ زینب کا تھا، کہ معجزہ شبیر کا

کفر سے لڑنے کی دو ہی حکمتیں ہیں، دین میں
ایک منصوبہ حسن کا، دوسرا شبیر کا

کیا ہمیں تولےگا کوئی، درہم و دینار سے
ہم کو مخمل سے ہے بڑھ کر، بوریا شبیر کا

درد،جرّت،اشک،ماتم،حوصلہ،کردار،صبر
ہے میرے ترکش میں ہر دم، اسلحہ شبیر کا

خاک اُس زینب کے آگے ٹھہرتا دربارِ شام
جرّتِ حیدر تھی جس میں، حوصلہ شبیر کا

خوف تھا عبّاس کا لاحق یزیدی فوج کو
حضرتِ عبّاس پر تھا، دبدبہ شبیر کا

آج بھی کہتے نہیں تھکتے، یزید ابن یزید
اقتدار و سلطنت تھا، مسئلہ شبیر کا

دے خدا توفیق، تواے شیخ مَس کرنا کبھی
پرچمِ عبّاس، یا پھر تعزیہ شبیر کا

کیسے ممکن ہے کہ مدحِ شاہ لکھےجعفری
کیسے کر سکتا ہے کوئی، تجزیہ شبیر کا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سید مبارک شاہ کا سلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ ذاکر حسین ضیائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کس رخ سے خوں گرا تھا مرے تشنہ لب ترا
صحرا میں پڑ گیا تھا بھنور کربلا کے بعد

خیموں کی آگ آنکھ میں بھرتی یوں دھواں
پڑتی ہے کربلا پہ نظر کربلا کے بعد

صبحِ وطن تھی شامِ غریباں کے اس طرف
باندھا گیا تھارختِ سفر کربلا کے بعد

پانی میں دیکھتا ہوں فقط تشنگی کو میں
آنکھوں کو لگ گئی ہے نظر کربلا کے بعد

اے ترجمانِ سورہ کوثر ترے عدو
ابتر ہیں اور تو ہے امر کربلا کے بعد

اک اور کربلا کی ضرورت ہے اے خدا
اسلام زندہ ہوتا ہے گر کربلا کے بعد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Musaddiq Lakhanie
محترم مصدق لاکھانی صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایسا اعجاز کسی درد میں کب ہوتا ہے
درد جب دل کے دھڑکنے کا سبب ہوتا ہے

حق کی نصرت کو جوانوں مقید نہ کرو
یہاں چھ ماہ کا بچہ بھی غضب ہوتا ہے

کربلا آؤ خطا کارو ۔۔۔ بلا خوف و خطر
حر بتائیں گے یہاں سب کا ادب ہوتا ہے

علم قرآن کی تفسیر حدیثوں کا بیان
خیر سے مجلسِ شبیرٌ میں سب ہوتا ہے

پیاس کے جام سے سیراب ہوے جاتے ہیں
کربلا والوں کا عرفان عجب ہوتا ہے

سرخئ شب تھی کہ اصحاب کے چہروں کا جمال
حق پہ مٹنا ہو تو یوں جشنِ طرب ہوتا ہے

یوں تو اجداد مرے کیا تھے پجاری تھے مگر
جو عزادار ہے۔۔۔وہ عالی نسب ہوتا ہے

زندگی کیا ہے۔۔۔فقط شمعِ حسینی کا طواف
ہاں مصدق یہی پروانوں کا ڈھب ہوتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Ali Baba Taj
سلام بحضور حضرت ابولفضل عباس علیہ السلام
...................................................................
علی بابا تاج:

صحرا ہے تپتی ریت پہ پیاس کی لو چمکتی ہے
عزم کا پرچم ہاتھ میں لے کر مولا مشکیزے میں عہد وفا کا بھرتے ہیں
سچ کی جیت مقدر ہے
جھوٹ کے گھر میں ظلمت
شمر کی آنکھ میں اتری ہے
اک دریا کا پانی بند ہے
اک دھارے سے عرش کا دامن بھیگ رہا ہے
مدحت کے ہر باب میں عنواں
مولا کا ہے عہد و پیماں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام ۔۔۔۔۔۔۔۔۔۔ناصر ملک
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ جناب ذاکر حسین ضیائی

مشاہدانِ رسا ! کربِ نارسا کوئ ہے ؟
عزا نصیب سہی ، فکرِ کربلا کوئ ہے ؟

وہ العطش کی صدا پھر سنائ دی ہی نہیں
فرات پوچھ رہا ہے ،حسینؑ سا کوئ ہے ؟

یہ دشت دیکھتا رہتا ہے سرخ مہرِ مبیں
کہ روبروئے خدا ، بندہءِ خدا کوئ ہے ؟

نفس نفس میں شہادت کی جستجو کی دھمال
چراغ بجھ تو چکا ہے مگر اٹھا کوئ ہے ؟

رقم ہے فلسفہ ءِ صبر اور بقائے دوام
بجز حسینؑ کے تاریخ میں لکھا کوئ ہے ؟


Faheem Shanas

سلام یا حسینؑ
فہیم شناس کاظمی
....................................

جو بھی شامل ہے عزاداری میں
شک نہیں اُس کی وفاداری میں

جو بھی شبیرؑ کا ماتم نہ کرے
نام اُس کا لکھو غداری میں

مجلس و گریہ ماتم ہر پل
کتنا مصروف ہوں بےکاری میں

رن سے اکبرؑ کو اُٹھائیں کیسے
ہائے شبیرؑ ہیں دشواری میں

زیرِ سایہءعلم نکلے جلوس
مولا غازی کی علمداری میں

مل گئی نادِعلی کی شمشیر
وار کرتا ہوں بہت کاری میں

یہ پیمبرؐ سے‘ پیمبرؐ ان سے
بات کرتا نہیں تکراری میں

کربلا ہو کہ وہ جنت ہو کوئی
بس ملے آپ کی سرداری میں


۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام:
سید علی عمار کاظمی ( بدو ملہی)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ: سید اسد علی شاہ

یہ آل محمد پہ قیامت کی گھڑی ہے
امت ہے کہ احسان چکانے کو کھڑی ہے

صف بستہ مسلماں جو سرِ دشتِ بلا ہیں
یہ جنگ تو لگتا ہے سقیفہ کی کڑی ہے

عباسِ جری نہر کنارے جو پڑے ہیں
وہ مشکِ سکینہ بهی اِدھر زخمی پڑی ہے

اعدا کی یہی موت کا سامان ہے مولا
جو جنگ ترے ہاتهوں پہ اصغر نے لڑی ہے

اک سمت گلہ شہہ کا لعیں کاٹ رہا ہے
اک سمت علی زادی بہت سہمی کهڑی ہے

سجادع مرے بیٹے اٹھو جل گئے خیمے۔
بچوں کو سنبهالوں کہ یہ تیروں کی جهڑی ہے

عمار غمِ شاہ بهلا کیسے لکهوں میں
اک برچھی ہمیشہ سے کلیجے میں گڑی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Ashraf Yousafi
محترم اشرف یوسفی صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ازل سے نور کے دھارے چراغ جلتے ہیں
فــــــــــرات تیرے کنارے چراغ جلتے ہیں

یہ کیسی رات ہے سکتہ ہے چارسو طاری
لرز رہے ہیں ستارے چراغ جلتے ہیں

یہ خیمہ گا ، یہ عون و محمد و اکبر
یہ فاطمہؑ کے دلارے چراغ جلتے ہیں

ہواۓ ظلمت ِ عالم وہ کیا ہوا تیرا
ابھی تو سارے کے سارے چراغ جلتے ہیں

کہا حسینؑ نے ایسی کوئ مثال تو لاؤ
کہ جس طرح یہ ہمارے چراغ جلتے ہیں

یہ خاک ہے کہ جو لب تشنگاں کو جنت ہے
یہ شہر ہے جہاں سارے چراغ جلتے ہیں

حسین اسم ہے ایسا کہ جس کو ظلمت میں
کوئ کہیں بھی پکارے چراغ جلتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔


سلام: اعتبار ساجد:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تعاون: ذاکر حسین ضیائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غم و ابتلائے حسینؑ کا ابھی اختتام نہیں ہوا
مرے نینوا کے مسافرو ! یہ سفر تمام نہیں ہوا

سرِ رہگزر ہے مکالمہ ! ابھی اک امیرِ سپاہ سے
ابھی سنگ موم نہیں بنا،ابھی حُر غلام نہیں ہوا

ابھی رنگ سرخ نہیں ہوا کسی موجِ نہرِ فرات کا
ابھی آگ خیموں سے دور ہے،ابھی وقتِ شام نہیں ہوا

جو شہید ہے وہ شہید ہے ،جو یزید ہے وہ یزید ہے
فقط اپنے قصر و سپاہ سے کوئ نیک نام نہیں ہوا
(اعتبار ساجد )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Shakeel Jazib
محترم شکیل جاذب:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بارگاہِ امامت میں حاضری کے لیے سلامِ عقیدت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کُچھ نے کہا کہ اِس طرح کُچھ کا تھا فیصلہ کہ یوں
مر کے مگر حُسین۴ نے جینا سِکھا دیا کہ یوں

صبر کی ڈھال تیغ کو کرتی ہے کُند کِس طرح
کوئی اگر یہ سُن سکے کہتی ہے کربلا کہ یوں

دشت کی کیا بساط تھی پانی کی کیا مجال تھی
اہلِ رضا کو علم تھا اُس کی ہے یہ رِضا کہ یوں

فتح و شکست و مرگ و زیست کیسے بدلتے ہیں مقام
سّرِ حیات کر دیا اہلِ جہاں پہ وا، کہ یوں

اپنے لہو سے با وضو ہو کے نمازِ عشق کا
دیکھ جبینِ عصر دیکھ ہوتا ہے حق ادا کہ یوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Tauqir Abbas
جناب توقیر عباس کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کتنا عجیب شور مرے بام و در میں ہے
لگتا ہے کوئ زلزلہ جیسے سفر میں ہے

اب تک رکا نہیں ہے شہادت کا سلسلہ
اب تک مرا حسین مسلسل سفر میں ہے

مجھ سے لکھی نہیں گئ دردوں کی داستاں
یہ کیسی عاجزی مرے دست. ہنر میں ہے

اخبار کے حروف لہو میں ہیں تر بتر
مقتول آج پھر کوئ تازہ خبر میں ہے


مظلوم اک دیار کی جانب رواں دواں
لگتا ہے کوئ کعبہ جبین. سفر میں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محترمہ نرجس افروز زیدی کا ھدیہٗ عقیدت:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محترمہ نرجس افروز زیدی کا ھدیہٗ عقیدت:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کتابت: اسد علی اسد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Narjis Afroz Zaidi
دیئے میں اپنے عصر کا ظہور تھا
زمیں سے تا بہ آسماں جو نور تھا

وہی تھے لوگ وارثانِ زندگی
کہ جن کو موت میں بھی اک سرور تھا

کِھلائے جا رہی تھی دشت میں گُلاب
کوئی ہُنر تھا آگ میں ضرور تھا

چراغ بُجھ رہا تھا اور بزم میں
عجیب روشنی کا اک وفور تھا

تھی ایک کربلا مرے شعر میں
اور ایک کربلا مرا شعور تھا

جُھکی تھی خاک پر جہاں کوئی جبیں
فلک کو اُس زمین پر غرور تھا

سنبھالتی تھی کس بریدہ جسم کو
زمین کا بدن تھکن سے چور تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Fatema Hassan
Qanetah Hashmi

کراچی سے ڈاکٹر فاطمہ حسن صاحبہ(Fatema Hassan) کا ارسال کردہ، یہ تازہ ترین اور غیر مطبوعہ سلام ملاحظہ فرمایئں:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تعاون: قانتہ ھاشمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جانتے تھے بچپن سے منزلِ شہادت کو
دین کے تقاضے کو، منصبِ امامت کو

وقتِ عصر سجدے میں سر کٹانے والے کی
کون بھول پائے گا، آخری عبادت کو

ایک اذان اکبرؑ کی، ایک خطبہ زینبؑ کا
آج بھی سناتے ہیں، ہم نبیؐ کی امت کو

اِک عَلَم جو خندق سے، کربلا تک آیا تھا
ہم بلند رکھتے ہیں، اُس کی ہر علامت کو

ہم درود پڑھتے ہیں، ہم سلام لکھتے ہیں
ہم نے زندہ رکھا ہے، اپنی ہر روایت کو

کانپ کانپ جاتی ہوں، اور خون روتی ہوں
فاطمہؔ جو لکھتی ہوں، پیاس کی اذیت کو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Athar Jaffri
جناب اطہر جعفری صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ آشنائے رضائے یزداں...
وہ محرم _رازہائے یزداں...

سناں پہ کی تهی ثنائے یزداں...
یہ مجلسیں ہیں عطائے یزداں....

پلا بڑها تها مشیئتوں میں...
وہ جانتا تها رضائے یزداں...

وہ آفرینش سے منتظر تها...
کہ امتحاں ہے برائے یزداں...

وہ کیوں نہ بچوں کو لے کے جاتا...
منی سے ہی تهی صلائے یزداں..

وہ زیب_دوش_رسول_اکرم...
وہ زینت_حق نمائے یزداں...

حسین والو ، سنبهال رکهنا...
حسینیت ہے عطائے یزدان...

وہ ارجعی نفس_مطمئنہ..
تهی کربلا میں ندائے یزداں...

لرزتا کیسے وہ قلب _اطہر...
نہ دل میں کچه تها سوائے یزداں..
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Ambareen Haseeb Amber
سلام بحضور امام عالی مقام:
عنبرین حسیب عنبر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلامِ عقیدت برائے حسین
خدا کا کرم ہے،ثنائے حسین

وہ جنت کے سردار ہیں بالیقیں
یہ دُنیا تو ہے خاکِ پائے حسین

بتا کربلا دشتِ ظلمات میں
کہاں کوئی آیا سوائے حسین

سرِ دشتِ تشنہ لبی یہ لکھا
کہ ہے آبِ کوثر برائے حسین

سماعت کو جب بھی ہو حق کی طلب
سُنائی دے مجھ کو صدائے حسین

اگر خیر و شر پہ ہو اپنی نظر
تو ہر دور ہے کربلائے حسین

کوئی دشت ہو،کوئی آبِ رواں
ندا آئے جاتی ہے ہائے حسین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Hameeda Shaheen
محرمہ حمیدہ شاہین کا تازہ سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمغہ ء اہلِ صفا ہے یادِ آل ِ مصطفےٰ
آنکھ میں خوابِ علی ، دل میں خیالِ مصطفےٰؐ

بارہا آئینہ ء دوراں سے آئی یہ صدا
ہے رُخِ ابنِ علیؑ عکسِ جمالِ مصطفےٰؐ

وہ غروبِ عمر میں کیسے نہ ہوتا بے مثال
اس کو بچپن سے میسّر تھی مثالِ مصطفےٰؐ

چوکڑی بھرنے کو تھے تیار یہ ارض و سما
ظلم کے گھیرے میں تھا جب وہ غزالِ مصطفےٰؐ

جاں نثارانِ حسیںؑ میدان کیسے چھوڑتے
زندگی کے ہجر میں ہی تھا وصالِ مصطفےٰؐ

حیف کیا موسم سہے سر سبز برگ و بار نے
اک تناور پیڑ تھا جب وہ نہالِ مصطفےٰؐ

حلم و شفقت میں نشانِ رحمتہ اللعٰلمیںؐ
استقامت میں علم دارِ جلالِ مصطفےٰؐ

صبرو استغنا کا ورثہ اپنے نانا سے لیا
تھا یہی خُلقِ عُلیٰ مال و منال ِ مصطفےٰؐ

السّلام اے ہالہ ء نورِ سراجِ آگہی
تھا کہیں تجھ میں خفی سِرّ کمال ِ مصطفےٰؐ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Baquer Zaidi
محترم سید باقر زیدی صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جو اہلِ دِل ہیں آلِ پیمبرؑ کے ساتھ ساتھ
محشر میں ہونگے ساقئ کوثرؑ کے ساتھ ساتھ

کمتر کا بھی مقام ہے برتر کے ساتھ ساتھ
کانٹے لگے ہُوئے ہیں گُلِ تر کے ساتھ ساتھ

آئی نہ جانے کیوں کسی بچھڑے ہُوئے کی یاد
دیکھے جو دو پرند برابر کے ساتھ ساتھ

میرا وجود بھی تو بنے اِک چراغِ نُور
گردش میں، مَیں بھی ہُوں مہ و اختر کے ساتھ ساتھ

پہلا سا اُن سے ربط و تعلّق ہے اب کہاں
وہ بھی بدل گئے ہیں مُقدّر کے ساتھ ساتھ

اب بھی ہے گرم معرکۂ کربلا یہاں
لوگ اب بھی ہیں یزید کے لشکر کے ساتھ ساتھ

کیا جانے کیا دِکھائے گا یہ ہجرتوں کا روگ
دُنیا بدل گئی ہے مِرے گھر کے ساتھ ساتھ

بزمِ سُخن بہ پاسِ روایاتِ محترم !
باقؔر ہیں آج حضرتِ اختر کے ساتھ ساتھ
باقؔر زیدی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Jalil Aali
محترم جلیل عالی صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دامِ دنیا نہ کوئی پیچِ گماں لایا ہے
سوئے مقتل تو اُسے حکمِ اذاں لایا ہے
۔
خونِ شبیر سے روشن ہیں زمانوں کے چراغ
شِمر نسلوں کی ملامت کا دھواں لایا ہے
۔
گونج اِس گنبدِ گیتی میں ہے دَم دَم اُس کی
اک بیاں وہ جو سرِ اوجِ سِناں لایا ہے
۔
فیصلہ حُر نے کیا اور حِرا نے دیکھا
جست بھرتے ہی اُسے بخت کہاں لایا ہے
۔
آج بھی سر بہ گریباں ہے اُسی حُزن میں وقت
شامِ غربت سے جو احساسِ زیاں لایا ہے
۔
وہ شہِ رنج و رجا ہے سو یہ اُس کا شاعر
نذر کو چشمِ رواں قلبِ تپاں لایا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Farah Rizvi
محترمہ فرح رضوی کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کانٹوں نے مدد کی جو نہ پھولوں نے مدد کی
لوگوں نے نہیں میری ،اصولوں نے مدد کی

بندے کو خدا سے ہے وسیلےنے ملایا
تشریح شریعت میں رسولوں نے مدد کی

کیا داد وفا پائی ہے اے شیر منزہ
جب کٹ گئے راہوار تو جھولوں نے مدد کی

قدرت تھی مددگار سر شام غریباں
بالوں کو چھپانے میں بگولوں نے مدد کی
'
ہر گام پہ منزل کے نشاں بن گئے ،جیسے
اجداد کی میراث، اصولوں نے مدد کی

جب جب فرح درپیش ہوئی سختئ حالات
سردار ولایت کے مقولوں نے مدد کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Zamin Jafari
سید ضامن جعفری کے تازہ اشعار:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ کاروانِ عزا حشر تک رہے گا رواں
زمانہ یاد رکھے میرِ کارواں ہیں حُسینؑ

مقامِ کرب و بلا ہو کہ عصرِ حاضر ہو
میانِ معرکہِ کفر و حق جواں ہیں حُسینؑ

ہے کربلا کا یہ فتویٰ کہ ہر یزید رہے
وہاں وہاں سے گریزاں جہاں جہاں ہیں حُسینؑ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Behlool Zam Zam
بہلول زم زم صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خون سے تر ہے کربلا کی خاک
میر و رہبر ہے کربلا کی خاک

ایک اعجاز یہ حسینؑ کا ہے
آج گھر گھر ہے کربلا کی خاک

اس لئیے اس پہ سجدہ کرتے ہیں
شان و کشور ہے کربلا کی خاک

میری بخشش کی یہ ضمانت ہے
قبر میں گر ہے کربلا کی خاک

آبِ زمزمؔ میں ہے شفا لیکن
سب سے بہتر ہے کربلا کی خاک
بہلول زمزمؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Irum Naqvi
سلام ـــــــــــــــــــــــــ از : پروفیسر کرار حسین ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تعاون: سیدہ ارم نقوی

مولا تیرے کرم پہ دل و جاں نثار ہے
سینے کی آگ گلشنِ جاں کی بہار ہے

پلکوں سے جھاڑ لوں خس و خاشاک دشت کے
سنتا ہوں اس طرف گزرِ شہریار ہے ۔

ویران دل کے دشت ہیں ، ویراں ہے کربلا
گیتی پہ ظلم و حرص و حسد کا فشار ہے ۔

ذرے ہیں شہوتوں کے بگولوں میں منتشر
اے ابرِ نوبہار تیرا انتظار ہے ۔

کعبے سے چل پڑا ہے مدینہ کا کارواں
وہ کارواں جو غیرتِ حق کی پکار ہے ۔

پھوٹی کرن خدا کے جلال و جمال کی
دامن ، شبِ سیاہ کا اب تار تار ہے ۔

جو آۓ خونِ جان و جگر ساتھ لے کر آۓ
منظور زینتِ چمنِ روزگار ہے ۔

منزل قدم قدم ہے حیاتِ دوام کی اور
ساتھ ساتھ موت بشکلِ غبار ہے ۔

دیکھو تو اس غبار میں اے صاحبانِ دید
خود شہسوارِ اشہب، لیل و نہار ہے ۔

پشت و جبیں پہ ہاتھ ہے پروردگار کا
مختارِ کارخانہِ پروردگار ہے ۔

شمشیرِ لا الہ ہے ابرو کھنچی ہوئ
روشن نطر میں جلوہِ حق آشکار ہے ۔

وہ برق ہے جو شمعِ شبستانِ بندگی
پہلو میں اس جری کے وہی ذوالفقار ہے ۔

عزمِ حسین (ع) ہے جرسِ کاروانِ دین
اس کارواں کی دستِ خدا میں مہار ہے ۔

ہوتی ہیں طے رضا و مشیت کی وادیاں
اللہ ! کیا جبر ہے ، کیا اختیار ہے ۔

اٹھتے ہیں ہر قدم پہ قیامت کے زلزلے
قطبِ زمین کی طرح ، قدم استوار ہے ۔

کس شان سے محاسبہ کرنے چلا ہے صبر
دنیاۓ ظلم مضطر و بے اعتبار ہے ۔

خارا شگاف تیشہِ درد اس کے ہاتھ میں بے
چین قلبِ سنگ کے اندر شرار ہے ۔

لرزہ میں ہیں ہوس کے بناۓ ہوۓ محل
صحرا نورد عشقِ غریب الدیار ہے ۔

نفسانیت کی ختم ہوئیں چیرہ دستیاں
چہرہ پہ دینِ حق کے غضب کا نکھار ہے ۔

یہ دشتِ کربلا ہے یا دامانِ فاطمہ (ع) ۔
لاشِ شہید باغِ جناں کا سنگھار ہے ۔

جس جا بسیں گے آن کے دنیا جہاں کے درد
آوارہ گرد دل وہی تیرا دیار ہے ۔

جس جا مصیبتوں میں ہو حاصل سکونِ جاں
جانِ حزیں وہی تیری جاۓ قرار ہے ۔

ہر اشک جس چمن میں درِآبدار ہے
ہر آہِ سرد ناقہِ مشکِ تتار ہے ۔

اے عندلیب یک کفِ خس بہرِ عاصیاں
طوفانِ آمد ، آمدِ فصلِ بہار ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Noshi Gilani
آسٹریلیا سے جناب سعید خان صاحب کا سلام:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہوائے دشت ہے ماتم گزید چاروں طرف
کریں گے دل غمِ کربل کشید چاروں طرف

سحر اُداس ہے وحشت سرائے کربل میں
پڑے ہیں خاک پہ شہ کے شہید چاروں طرف

حسینیت کو مٹانا کسی کے بس میں نہیں
اگرچہ پھرتے ہیں اب بھی یزید چاروں طرف

رَہِ حجاز میں دشمن کی دسترس ہے تو کیا
سپر ہیں شاہِ نجف (علیہ السّلام) کے مرید چاروں طرف

کھلا ہے جب بھی لبوں پر سوادِ ذکرِ حسین (علیہ السّلام)
ملی ہے خوشبوئے مولا، سعیدؔ چاروں طرف
۔۔۔۔۔۔۔۔۔۔۔۔۔۔۔۔۔۔۔۔۔
Muqsit Nadeem
سلام کے چند اشعار:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مُقسط ندیم

میں تجھکو عالی جناب لکھوں' میں تجھکو عالی مقام لکھوں
میں آب۔زم زم سے حرف دھو لوں تو تجھ پہ کوئی سلام لکھوں

بہت شرف ہے مری خرد اور مرا جنوں دونوں متفق ہیں
میں خود کو تیرا غلام سمجھوں میں خود کو تیرا غلام لکھوں

جہاں کہیں ذکر۔کربلا ہو'کسی صدی میں ' کسی جہاں میں
یزیدیت کی میں موت لکھوں'حسینیت کو دوام لکھوں
۔۔۔۔۔۔۔۔۔۔۔۔۔۔۔۔۔۔












٭٭٭٭



٭٭٭٭٭



٭٭٭٭٭



٭٭٭٭٭٭